မြန်မာ့ မီးရထားမှ မန္တလေး - မြစ်ကြီးနား ပြေးဆွဲလျက် ရှိသော အမှတ်(၃၇) အဆန်နှင့် (၃၈)အစုန် လူစီး အမြန်ရထားကို မကြာမီ ကာလအတွင်း ကချင် အများစုပိုင် ပုဂ္ဂလိက ကုမ္ပဏီရထား အဖြစ် ပြေးဆွဲပေးမည် ဖြစ်ကြောင်း သိရသည်။
အဆိုပါ ပုဂ္ဂလိက လုပ်ငန်း လုပ်ကိုင်ခွင့် အတွက် ပြီးခဲ့သည့် ဇွန်လအတွင်း အကျိုးတူ စင်းလုံးငှား စနစ် လေလံတင်ဒါများ ခေါ်ယူခဲ့ရာ ၄င်းကုမ္ပဏီက ရရှိခဲ့ခြင်း ဖြစ်ကြောင်း မန္တလေး ဘူတာကြီး မီးရထား ဝန်ထမ်း တစ်ဦးထံမှ သိရသည်။
အဆိုပါ ရထား ပြေးဆွဲနိုင်ရေး အတွက် မြစ်ငယ်တွဲပြင် စက်ရုံတွင် တွဲဆိုင်း အသစ်များ ထုတ်လုပ်လျက် ရှိကြောင်း၊ လက်ရှိတွင် အစုန်၊ အဆန် တွဲဆိုင်း နှစ်ဆိုင်း ဖြင့် ပြေးဆွဲနေပြီး ၄င်း တွဲဆိုင်းများ သည် Auto Coupler (အော်တို ကော်ပလာ) တွဲဆိုင်းများ ဖြစ်ကြောင်း၊ ကုမ္ပဏီ ပြေးဆွဲမည့် တွဲဆိုင်းကို အဆင့်မြှင့်တင် ထားသည့် ABC တွဲဆိုင်းများ ဖြင့် အစားထိုး ပြေးဆွဲပေး သွားမည် ဖြစ်ကြောင်း သိရသည်။
'' မြန်မာ့မီးရထား နဲ့ ကုမ္ပဏီ လေလံစာချုပ် အရ ကုမ္ပဏီက မန္တလေး - မြစ်ကြီးနား ခရီးစဉ် တစ်ခေါက်ကို ငွေကျပ် ၆၉ သိန်း ပေးသွင်းရမှာ ဖြစ်ပါတယ်။ လက်မှတ်ခ နှုန်းထား ကိုတော့ ကုမ္ပဏီက လက်ရှိ သတ်မှတ် ထားတဲ့ ဈေးနှုန်းထက် ၁ဝ ရာခိုင်နှုန်း တိုးကောက်မယ် လို့ သိရပါတယ်။ လက်ရှိ ပြေးဆွဲနေတဲ့ လက်မှတ်ခ နှုန်းထားတွေ ကတော့ ရိုးရိုးတန်း လက်မှတ် တစ်စောင် ငွေကျပ် ၇၅ဝဝ၊ အထက်တန်း ငွေကျပ် ၁၅ဝဝဝ၊ အထက်တန်း အိပ်စင် ငွေကျပ် ၁၈ဝဝဝ နဲ့ ပြေးဆွဲ နေပါတယ်။ ကုမ္ပဏီက ၁ဝ ရာခိုင်နှုန်း တိုးကောက်မယ် ဆိုရင် ရိုးရိုးတန်း ငွေကျပ် ၈၂၅ဝ၊ အထက်တန်း ငွေကျပ် ၁၆၅ဝဝ၊ အိပ်စင် ငွေကျပ် ၁၉၈ဝဝ နဲ့ ရောင်းချမယ် ထင်တယ်။ မန္တလေး - မြစ်ကြီးနား အမှတ် (၃၇၊ ၃၈) ရထားမှာ ရိုးရိုးတန်း လေးတွဲ၊ အထက်တန်း သုံးတွဲ၊ အိပ်စင် နှစ်တွဲ၊ ကုန်တင်တွဲ တစ်တွဲ၊ စုစုပေါင်း ၁ဝ တွဲနဲ့ ပြေးဆွဲ နေပါတယ် ... ''ဟု ၄င်းက ဆက်လက် ပြောပြသည်။
ကုမ္ပဏီရထား အဖြစ် ပြေးဆွဲရာတွင် ပါဆယ် တန်ဆာခ များကို ပြောင်းလဲ ကောက်ခံမည် မဟုတ်ကြောင်း ရထားထွက်ခွာ ချိန်ကိုလည်း ပုံမှန်အတိုင်း ပြေးဆွဲ ပေးသွားမည် ဖြစ်ကြောင်း သိရှိရသည်။
No comments:
Post a Comment